А sorry здесь тихие…

Фæрнджын ут! Æрæджы проспекты иу кæронæй иннæмæ трамвайы æрцыдтæн. Рагæй нал спайда кодтон транспорты ацы хуызæй, уымæ гæсгæ раст цыма музейма бахаудтæн, уыйау фæйнæрдæм джихтæ кодтон. Уæгъд бынæттæ дзы нæ уыд, уæвгæ бадынмæ дæр нæ тырныдтон – цалдæр минуты алæууыны тыххæй рынчындонмæ никæй аластой нырма.

Адæмы дзолгъо-молгъо æмæ сусу-бусу ныхас хъуыст алы къуымæй дæр. Горькийы номыл уынджы трамваймæ схызт иу ацæргæ сылгоймаг. Къæсхуыртæ нæ уыд, йæ къухы цы хызын дардта, уый дæр уæдæ «гыццыл» рахонынмæ æвзаг нæ тасыд. Йæ цæсгомы `ндавд мæ зæрдæмæ нæ фæцыд: раст цыма адæм иууылдæр йæ хæсджынтæ уыдысты, ахæм цæст сыл ахаста. Бамбæрстон æй, бынат агуырдта. Нæ йыл фæхæст йæ цæстæнгас. Сылгоймаджы цæсгом ивылд донау уырынгтæ адардта…

Уæдмæ йæ иу æрыгон лæппу фæфиппайдта. Уайтагъд йæ бандонæй фæгæпп ласта, бадзырдта сылгоймагмæ, йæ бынат ын кæй дæтты, уый йын фехъусын кодта æмæ… йæхи `рцæттæ кодта зæрдиаг «бузныг»-мæ! Куыннæ, стæй… Сылгоймаг йæ хызын зæххыл нытътъæпп ласта, уыцы цæфæй дзы цавæрдæр авг базгъæлæнтæ йæ мидæг (йæ тæфæй йæ бамбæрстон, цыдæр цæхджын джитъритæ кæй уыдысты, уый). Авджы дзæгъ-дзæгъмæ нæ хъайтар ус цæф галау ныббогъ кодта, йæ къухтæ йæ фæрстыл авæрдта æмæ лæппуйыл йæхи андзæрста: кæд, дам, мын бынат лæвæрдтай, уæд, дам, мын æй раздæр радтаис. Ома, дам, вагон анкъуысыны размæ. Иудзырдæй, фондз минутмæ сылгоймагыл цыдæриддæр бæллæхæй æрцыд, уыдон иууылдæр йæ аххос фесты! Суанг ма цæхджынты кæуинаг хъысмæт дæр…

Лæппу цы сдзырдтаид фырдиссагæй, уый, æвæццæгæн, зонгæ дæр нæ кодта. Æрвдзæфау фæцис… Йæ цæстытæ цыппартигъонæй йæ ныхмæ сфардæг сты, йæ сæрæн ницы æмбæрста. Æрмæст ма фынкдзыхæй загъдгæнæг сылгоймагæй йæхи цадæггай иуварс ласта. Раст зæгъгæйæ, мæхæдæг дæр ын фæтарстæн. Æнхъæл уыдтæн æмæ цæхджынты авгæй цы сæстытæ баззад, уыдон кæронмæ лæппуйы сæрыл базгъæлæнтæ уыдзысты.

Адæм сылгоймагыл схор-хор кодтой æмхуызонæй. Чи йæ сабыр кодта, чи йемæ æмзагъд самадта, дæхи æрæмбар, зæгъгæ, фæлæ ма дын æй чи баурæдтаид! Алкæйы фаг дæр сси – адæмæй алчи йæ цъуттайы хай райста. Йæхи нал баурæдта трамвайскъæрæг дæр, иу æрлæууæн бынаты раздæхт сылгоймагмæ æмæ йын бауайдзæф кодта, ам мын мæ вагонæй æррадон цы сарæзтай, зæгъгæ. Ай та ма мын цы гилдз у, зæгъгæ, цæстæнгасимæ знæт сылгоймаг уымæ дæр бадодой кодта. «Абон фæстаг хатт куы бакусон»-ы хъуыдыйæ тæрсгæйæ трамвайскъæрæг аздæхт размæ æмæ ницыуал сдзырдта. Вагон дарддæр агыбар-гыбур кодта… Лæппу ахызт… Бæлццæттæ басабыр сты… Хылкъахæг сылгоймаджы дæр йæ загъд-заманайы зæдтæ `мæ дауджытæ къаддæр рæхойын райдыдтой…

Æз та хъуыдыты аныгъуылдтæн… Кæддæр мæхиуыл дæр ацы цауы æнгæс хабар æрцыд. Мæ бынат æнæхъынцъымæй радтон иу ацæргæ лæгæн. Уый мæ йæ хъæлæсы ахаста, кæм, дам, федтай зæронд лæг, чи, дам дæ дæ бынат дæттæг кæны?! Бадыс æмæ, дам, бад! Гъе, афтæ… Æмæ æз дæр сбадтæн фæстæмæ! Гæнæн ис, искæй зæрдæ мыл фæхуда, фæлæ мæхицæн уæд дзырд радтон, исчи мæ цуры йæ уд куы иса бадынмондагæй, уæддæр никуыуал фенкъуысдзынæн. Дзырд радтон, фæлæ йæ… никуы сæххæст кодтон! Архайдтон, фæлæ мын нæ рауад.

…Вагонæй рахызтæн. Сылгоймаг ма иугай дзырдæппарæнтæ кодта. Кæд йæ быцæу ногæй стынг ис, уæддæр æй нал базыдтон. Фæлæ ахæм «куырыхон зондамонджытæй» Хуыцау бахизæд! Ныры дуджы кæстæртыл цъыфкалæн чи нæ кæны, уый кæнæ къуырма у, куырм, кæнæ та гоби. Ме cæфт уынын «æз дæ карæнæй ахæм-ухæм уыдтæн», зæгъгæ, ныхасæй! О, куыннæ… Трамвайы бæлццæтты чи фæцæйнадта, уый мæ карæнæй сыхы фидауц æмæ мыггаджы сомыгæнæн уыдис, уæдæ… Нал ныууагъта! 20-аздзыдæй чи цы уа, уый зæры бонты дæр æндæр ницы уыдзæн. Гъер æнæхъæн дуне дæр сыстæд ацы хъуыдыйы ныхмæ!

«Бузныг» фехъусыны бæсты уыцы лæппу масты хай цæй номыл бацис, кæд æмæ хи дарыны дæнцæг хъуамæ хистæртæй иса? Йæхи куыд равдыста, уымæ ницы аипп æрхæссæн уыдис, уæддæр дзы уыцы сылгоймаг йæ ныхтæ, цымæ, цы ныссагъта? Цы зæрдæйæ хъуамæ иннæ хатт кад кæна йæ хистæрæн? Уæдæмæ уал хистæр йæхицæй райдайæд, стæй уæд ныхас кæндзыстæм. Се `ппæтæй, ай-гъай, нæ зæгъын, фæлæ карджын адæмæй иуæй-иутæм куы бакæсай, уæд адæймаг хъуыдыты ацæуы, «ныр, цымæ, ай цæуыл базæронд ис?», зæгъгæ… Иу уырыссаг æмбисондау: «мудрость приходит с возрастом, но иногда возраст приходит один».

Дæ кæстæр дын кад куы нæ кæна, уæд уымæн йæ аххосаг дæхи цур агур. «Бузныг» дæ куы никуы фехъуса, уæд дын æй йæхæдæг дæр никуы зæгъдзæн, схуыст ныхас æм куы кæнай, уæд дын дæхимæ дæр ахæм цæстæнгас дардзæн, нымады дæм дæ кæстæр куы нæ уа, уæд искæд бон дæ фæдонтæй кад ма агур! Æви раст нæ дæн?

Цæуон, истытæ акусон…

Если вы нашли ошибку, пожалуйста, выделите фрагмент текста и нажмите Ctrl+Enter.

СТАТЬИ

Почему дело Цкаева переносили 22 раза?

Как кинуть бюджет на 12 миллионов, чтобы тебе ничего не было

Тревожная статистика — лишь 5,5% опрошенных доверяют депутатам Владикавказа

ПРО историко-культурные беды Владикавказа

В почве Северной Осетии накопились критически опасные концентрации вредных веществ

Как кандидаты в депутаты Гордумы Владикавказа набирают электорат из соцсетей

Сообщить об опечатке

Текст, который будет отправлен нашим редакторам: