Уæрдоны зарæг

Байриат, хорз адæм! Ныхасы бар мæм æрхауд, фехъуыстон… Гъемæ, хорз! Кæд мæнмæ дæр иу байхъусæг разынид. Æппын мын куы ницы бантыса, уæд мæ мондæгтæ уæддæр суаддзынæн. Фæлæ уал мæ исчи куы бафæрса, ды та чи дæ, зæгъгæ. Мæ дзуапп цæттæ у – сымахæй иу. Мæ ном мын зонут, мæхи – æвæццæгæн, нæ.

Кæддæр æз дæр мæ цæстæнгасæй уæлæрвтæ ралæмар-балæмар кодтон: космонавт, дам, мæ суæвын фæндыд. Æмæ уым диссагæй ницы ис — Советон Цæдисы хъомылгонд сывæллæттæй космонавт суæвын кæй нæ фæндыд, ахæм нæ разындзæн. Фæлæ мын хæрдты стæхын нæ бантыст. Зæххыл мæм гагкæй уайын хуыздæр фæкаст. Скъолайы куы ахуыр кодтон, уæд та дохтыры урс дарæсмæ хæлæгæй мардтæн. Афтæ мæм каст, цыма уыцы куыст чи кæны, уыдонæн сæ удтæ дæр афтæ сыгъдæг сты. Дур мыл мачи ныццæвæд – сæттын ыл, ныр уыцы хъуыдытæй дард дæн. Фæлæ уæд цы `мбæрстон… Райсомæй-изæрмæ биологи æмæ химийы чингуытæй мæ сæр уæлæмæ нал истон. Латинаг æвзагæн ме `мкъласонтæ йæ кой дæр никуы фехъуыстой, æз та йæ аходæны бæсты дæр ме стъолыл дардтон.

Иуæндæсæм къласы кæронмæ мæхицæн скарстон: «Уыдзынæн æрмæстдæр дохтыр!» Фæлæ, дам, адæймаг – фæндтæгæнæг, Хуыцау – аразæг. Уæллæй, мæ уырг æмæ мæ цæст куы ауæй кодтаин, уæддæр студент суæвыны фаг не суыдаин. Цы зæгъинаг дæн, уый бамбæрстаиккат. Дохтырты куырдадзæй мæ фæндаг ракодтон Фæскомцæдисон паркыл. Æмæ мæнæ замана! Университеты æфсæн быруйыл метрæй метрмæ бафиппайдтон гæххæтыл хъусынгæнинæгтæ, «Приемная комиссия», зæгъгæ. Цæй, зæгъын, æххæст ардæм дæр бакæсон. Мæ куыстытæ мæ, мыййаг, нæ домдтой – баздæхтæн сæм. Уый дын, гъе! Иу квадратон сантиметрыл уыйбæрц фидæны юристтæ æмæ экономисттæ никуыма федтон. Уæд, цымæ, æз кæмæй фæдæн, мæ гæххæттытæ уым цæуылнæ бамидæг сты?! Нæ зонын… Абон дæр мæм диссаг кæсы.

Рацæй-рабон, афтæмæй ирон филологи æмæ журналистикæйы факультетыл мæ цæст æрхæцыд. Гъа, цы уа, уый уæд! Æвзагзонынадæн мæхи нывондæн æрхастон. Бузныг мæ ахуыргæнджытæн, цыдæриддæр сæ бон уыд, уымæй сæхи не `вгъау кодтой махæн. Бирæ азтæ рацыд, фæлæ не хсæн раздæры хуызæн хъæрмуд ахастдзинæдтæ нæ байсыстысты. Ныртæккæ нæ бирæтæ сæхимæ фыды номимæ дзурын дæр нал уадзынц, афтæ æнувыд стæм кæрæдзийыл.

Уыйфæстæ та телеуынынад. Уæвгæ, ахуыр ма кодтон уæд. Цыппæрæм курс йæ тæккæ цыреныл уыд, афтæ нæм факультетмæ фæзынд телекомпани «Алани»-йы сæйраг редактор Агънаты Гæстæн. Агуырдта ног кусджыты. Нæ декан Къомайты Риммæ йын мæнмæ ацамыдта. Цалдæр боны фæстæ мæ ссæуын хъуыд телестудимæ. Æз цæмæй хæйрæг уыдтæн, æмæ ахæм цæхгæр ивддзинæдтæ æрцæудзæн мæ царды. Цавæр телеуынынад, æз та цы `мбарын уыцы куыстæн, зæгъгæ, ахæм хъуыдытæ кодтон. Кæуылты цæугæ у «Осетинский горкæ»-мæ, уый зонгæ дæр нæ кодтон. Æз дæр мæ ных, антеннæ мæм кæцæй зынди, уырдæм сарæзтон. Ссардтон æй, бахызтæн дуарыл æмæ… дзы ныр 15-æм аз баззадтæн.

Цард диссаг у. Уæд мæ ныфс ацы куыстмæ нæ хастон, ныр та мæм афтæ кæсы, цыма æндæр куыст кæнын нæ базонин. Фæлæ мæ раздæры фæндтæй бынтон не схицæн дæн. Изæрыгæтты, фæскуыст хæдзармæ цæугæйæ арæх мæ цæстытæ арвыл ауæгъдæй баззайынц: стъалыты дзир-дзурæй аивдæр ма цы ис! Космосон тыгъдад чи кæрды, уыдонмæ абон дæр ма хæлæг фæкæнын. Науæд дохтыры куыст… Телестудийы уацхæссæг уæвгæйæ мæ-иу рынчындонмæ цæуын куы бахъуыд, уæд-иу мæ оператор фæстæмæ тыххæй раласта: мæ зæрдæмæ тынг цыдис Гиппократы фæдонты архайдмæ цæст дарын.

Иухатт мын ног технологитæм гæсгæ операцийы тыххæй æрмæг саразын бахæс кодтой. Мæнæн мæ цинæн кæрон нал уыд! Æрхæццæ стæм рынчындонмæ, мидæмæ бацыдыстæм, ссардтам, чи нæ хъуыдис, уыдоны. Уалынмæ дын нæ цыдæр бæрнон кусæг æддæмæ ссивыныл куы схæцид, операцимæ, дам, уæ нæ бауаддзыстæм! Цæуылнæ, загъгæ, уый та нын йæ бон бамбарын кæнын нæ уыдис. Æвæццæгæн, æмæ йын хицауы мондæгтæ йæ уды рæбынтæ ахъыдзы-ахъыдзы кодтой, кусын æм æрцыдис. Фæлæ афтæ æнцонтæй кæй басæттай, мах дæр ахæмты каст нæ кодтам. Куыннæ стæй! Мæ былыцъæрттæ кæмæ хордтон, уымæй куыд хъуамæ фæкæнон мæхи æнæхай! Йæ риуыгуыдырæй ныл æддæмæ чи рахæцыд, уыимæ нын карз ныхас бацайдагъ. Цы нæ нæ рахуыдта, иу ахæм нал баззад: «дæлимонæй» райдай æмæ «куыдзы къæбылайæ» фæу! Кæддæр-кæддæр æй чидæр нæ цурæй ахæр-хæр кодта. Æрмæст ма нæм иннæ уæладзыгæй йæ удаист хъæр райхъуыст: «Хицауады хæзгултæææ!!!» Раст загъгæйæ, авæццæгæн, дохтыртæ ахæм адæмæн хъуамæ сæхиуыл аудой æмæ сæ æхсæнадмæ ма уадзой! Иу уысм, урс халат кæй не ссæрфтон, уыцы хъуыдыйæ фæбузныг дæн – ахæмтæм кæсынæй Хуыцау бахизæд! Цæмæй йæ зыдтон, æмæ мын журналисты дæсныйад уымæй ноджы карздæр нывтæ фенын кæндзæн…

Фæлæ хъаст нæ кæнын… Мæ ныхас – æргом æмæ æрмæстдæр мæхи! Бадын мæхи уæрдоны, кæнын мæхи зарæг… Кæд ын йæ зæлта исчи йæ зæрдæмæ хæстæг айса, уæд дзы фæбузныг уыдзынæн. Кæд нæ, уæддæр афтæ. Мæхиуыл ма мæ акусын хъæудзæн, æвæццæгæн. Архайдзыстæм… Бирæ цыдæртæ ацахсы адæймаджы цæст. Фæлæ, æвæццæгæн, алцы адæмы рæгъмæ хæсгæ нæу у. Нæ ивгъуыд, нæ абон, нæ фидæн – уый дардзынæн мæ хъуыдыйы. Фысгæ дæр – ууыл. Не `взаг, не  `хсæнады аиппытæ æмæ сгуыхтытæ, фæлтæрты бастдзинад, цардыуаджы фæзилæнтæ, æгъдау æмæ æнæгъдаудзинад… Уыцы темæтæн бынат уыдзæн ацы рæнхъыты. Кæд, мыййаг, сæ сæрты ахизон æмæ ма истæмæ фемдзаст уон, уæд мæм-иу загъд мачи кæнæд – чизоны, цавæрдæр фæзынд мæ афтæ бацагайдта, æмæ йæ æнæбафиппайгæ нæ фæдæн. Афтæтæ… Цæй, абон уал æгъгъæд фæуæд. Æмбæлдзыстæм ма… Цæуон, истытæ акусон…

 

 

СТАТЬИ
12.03.2024

Торговая сеть запустила новую акцию

26.11.2023

Все, что вы хотели знать о мерах соцподдержки мам

16.11.2023

Торговая сеть запустила предновогоднюю акцию

17.10.2023

Нового министра ВД по Северной Осетии Демьяна Лаптева представили личному составу ведомства

16.10.2023

Во Владикавказе проведут рейд по незаконным нестационарным торговым объектам

13.09.2023

В Северной Осетии появился ВкусВилл

Сообщить об опечатке

Текст, который будет отправлен нашим редакторам: