ЗÆДТЫ ЦÆССЫГТÆ

Фæстæмæ раздæхтыстæм, иу райсомы цыппар сахаты уыдаид, афтæ… Уыцы боны нывты уацарæй нал мæ зонд, нал мæ зæрдæ, нал мæ цæстытæ хицæн кодтой. Мæ ных нæ кусæн машинæйы уазал авгыл бандæгъд: кæд, зæгъын, мæхимæ иучысыл æрцæуин… Куыннæ, стæй!.. Арв хæкъуырццæй куыдта адæмимæ. Машинæйы рудзынгыл æддæрдыгæй цы доны `ртæхтæ згъордтой, уыдон ног саударæг мадæлты уадултыл цæссыгтæй ницæмæй хицæн кодтой: cæ хуызæн сын кæрон нал уыд…

Арвы зæдтæ дæр, дам, Ирыстонимæ æмкуыд кæнынц… Уый нæ шофыры ныхас уыд. Диссаг… Æвæццæгæн, раст загъта: скъолайы цы тугуарæн æрцыд, уымæ зæдтæ дæр нынниудтой! Æз сæм мæхимидæг загъд кодтон, зæгъын, куыд бауагътат сымах та ахæм æбуалгъ хабар æрцæуын?! Кæдæм кастыстут, зæххон адæмы мулк æмæ æхцайыл кæрæдзийы уæй кæныныл сæ хæйрæг куы сардыдта, уæд?! Беслæнæй Дзæуджыхъæумæ фæндагыл шофырæй æндæр ницыуал сирвæзт, мæнмæ та афтæ каст, цыма æппындæр йæ дзыхыл не `рхæцыд. Дзурыны бон нæ, фæлæ цæрыны ныфс дæр бæрзæйсаст фæцис уыцы аз…

Æвæджиауы райдзаст райсом скодта 2004-æм азы 1-æм сентябры. Куыстмæ фæндагыл мæ цæст æрхæцыд Сæнайы хохыл. Мæ зæрдыл æваст æрбалæууыдысты Хъолайы цъитийы бæллæхтæ… Цымæ ма, зæгъын, уымæй уæззаудæр хабар цы уа?! Уыцы хъуыдытæй мæ телефоны дзæнгæрæг æваст ратыдта. «Алло», «О», «ЦЫЫ?!», «Цавæр скъола?!», «Кæд?!», «Марынц» та цы хоныс?!?», «Æмæ чи сты?!», «Цал сты?!»… Мæ хъуыдытæ сæмтъеры сты! Ныртæккæ мын куыстæй цытæ радзырдтой, уыдæттæй адæймаг йæ фыны дæр тæрсгæ кæны, Ирыстонæн та сæ йæ хъысмæт хи цæстæй фенын загъта.

Беслæны балæууыдтæн иу-сахаты фæстæ. Адæм æмризæджы удаистæй ратæх-батæх кодтой горæты уынгты. Скъоламæ хæстæг нал уагътой, хæстæг æм чи баирвæзт, уый та йын йæ кæрты йæ адзал ссардта. Уæдмæ рæбæрæг — дыкъахыг сырдтæ тугмондаг дæндæгтæй ныххæцыдысты сывæллæтты хурхытыл. Чи никуыма `рцыд, ахæм «лæгдзинад»… Гъе, уæууæй, гъе!

Фыццаг бон, сæттын, мæн дæр нæ уырныдта, изæрмæ ацы хабарæн кæрон кæй не скæндзысты, уый. Мæ алыварс цы сылгоймæгтæ уыд, уыдоны сабыр кодтон, ма тæрсут, алцыдæр йæ гаччы сбаддзæн, тагъд уæ бинойнæгтыл уæ хæдзæртты сæмбæлдзыстут. Фæлæ хур акъул, уавæр та карзæй-карздæр кодта… Фидарæй мæ раздæр цы уырныдта, ууыл мæхæдæг дæр куыдфæстæмæ нал æууæндыдтæн. Мæхи, амынæты чи бахауд, уыдоны цармы тыхтон: цымæ, куыд сты, цы кусынц, цы хъуыдытæ зилдух кæнынц сæ мæгуыр сæрты… Нæ зонын…

Дыккаг бон дæр афтæ. Ницы бæлвырддзинад дзы рантыст. Цыдæр вазыгджын адæм-иу рæстæгæй-рæстæгмæ адæмы обæутты хсæнты фæзындысты æмæ-иу уайтагъд цыдæр фесты. Спортивон залы цы адæм уыдис, уыдон та удисæн рындзмæ иу бон хæстæгдæр фесты…

3-аг бон адæмы зæрдæтæ цыдæр ныфсы цъырттæй фæфидардæр сты. Мæнæ, дам, а-дыууæ минуты Масхадов хъуамæ фæзына æмæ, дам, йæ сырдты йемæ акæндзæн, сывæллæтты та, дам, хъуамæ суæгъд кæной. Суанг сихормæ скъолайы алыварс чи стыгур ис, уыдон уыцы ныхасыл æууæнкæй цардысты. Цалынмæ ма амынæттæй исчи удмидæг у, уæдмæ сæ кæд ссæрибар кæниккой… Мæ цæст æрхæцыд иу сылгоймагыл. Йæ ном Ритæ. Йæхимæ уыцы тых ссардта, цæмæй йæ мидбылты дæр бахуда. Æнхъæлмæ каст йæ фырт Хасанмæ. Абон æнæмæнгæй хъуамæ суæгъд уа амынæтæй æмæ йын хъуамæ бинонтæ æртæ чъирийы скувой…

Æваст скъолайы кæртæй тыхджын срæмыгъд райхъуыст… Уыйфæстæ дыккаг… Æртыккаг… Бон баталынг… Хæст бацайдагъ… Туг ныууарыд… Адæмы монцтæ бавзалы сты… Мадæлты дзыназын уæларвмæ сыхъуыст… Ирыстон йæ саутæ скодта…

Абон дæсæм аз рацыд. 2004-æмы ахуыры фæндагыл чи `рлæууыд, уыдон 2014-æмы уыдаиккой сколайы рауагъдонтæ. Фæлæ сæм сæ хъысмæт æгъатыр разынд… Науæд та цы загъдæуа, рæстæг, дам, хъæдгом байгас кæны, зæгъгæ, чи хъуыды кæны, уыдонæн. Чи зоны, буары хъæдгом – о! Фæлæ зæрдæйыл цы уыгардтæ æмæ ностæ ис, уыдонæн та цы хос ис?! Йæ хæдзарæй уыцы-иу бон æртæ, цыппар, фондз чырыны кæмæн рахастой æмæ хурыскаст Балсæджы цалхау кæмæн у, уый та цы кæна?! Йæ сывæллон дойныйæ ма амæла, зæгъгæ, йын йæ дзыхы тутæ чи кодта, уыцы мады зæрдæ цавæр тыхы хицау хъуамæ уа?!

Æвæццæгæн, ныфсæй цæргæ нын у дарддæр. Ахæм бæллæхтæ кæй нал æрцæудзæн фидæны, уыцы ныфсæй. Цы ма уа уымæй стырдæр аргъ, кæд æмæ ног фæлтæрты сабыр цард сабиты тугæй балхæдтам. Кæд æмæ Беслæны 1-æм скъола ахуыры къæсæры бæсты адзалы дуар сси… Кæд æмæ ног уæлмæрдмæ дунейы алы кæрæттæй адæм сæ тыппыртæ суадзынмæ цæуынц…

О, хæдæгай… Ритæ та йæ фырт Хасанæн уæдæй фæстæмæ дыгай чъиритæ хæлар кæны…

 

Если вы нашли ошибку, пожалуйста, выделите фрагмент текста и нажмите Ctrl+Enter.

СТАТЬИ
22.08.2019

Родственники уверены в невиновности обвиняемого во взяточничестве сотрудника Прокуратуры Сослана Созанова

Надоело платить за то, чего нет, и никто не знает, когда настанет обещанное, светлое безмусорное будущее

Почему дело Цкаева переносили 22 раза?

Как кинуть бюджет на 12 миллионов, чтобы тебе ничего не было

Тревожная статистика — лишь 5,5% опрошенных доверяют депутатам Владикавказа

ПРО историко-культурные беды Владикавказа

Сообщить об опечатке

Текст, который будет отправлен нашим редакторам: